Nadismaya ka ba?

Ginanap ang special election dito sa Zambales nito lamang Pebrero 4, 2012 para sa posisyon sa pagka-kongresista. Gaya ng inaasahan, kaliwa't kanan ang ginawang pangangampanya ng mga kandidato. Kanya-kanyang istilo ng pangungumbinsi sa tao. Nariyang sumayaw at kumanta sila. Nariyan din ang pag-aasta bilang isang pilantropo para lamang makuha ang loob ng mga botante. At higit sa lahat, nariyan din ang lantarang pamimili ng mga boto. Tsk...tsk...tsk... Bakit ko kaya alam na may namili ng mga boto? Di po ako isa sa mga ipinagbili ang karapatang ito kundi ang mga taong nakatanggap ng pera ang siyang nagsasabi nito.

Talaga bang ito na ang kalakaran sa ating halalan? Hindi ako nadidismaya sa mga nanalo or sa kahit sinong kandidato. Dahil bilang isang pulitiko, gagawin siyempre nila ang lahat ng paraan para manalo. Bagkus, nadidismaya ako sa mga taong ipinagyayabang pa na sila ay nagbenta ng kanilang boto. Hay naku!!! 

Noon, isang kahihiyan ang tumanggap ng pera kapalit ang boto pero bakit ngayon tila isang karangalan na ito para sa iba?

Sana mabago na ang mukha ng eleksyon sa mga susunod na halalan. Sana ang unang titingnan natin ay kung ano ang plataporma ng isang kandidato. Sana rin lahat ng namumuno sa barangay ay huwag saklawan o kaya harangin ang karapatan ng bawat isa sa komunidad na malaman ang plataporma ng bawat kandidato. 

At sana pagkatapos ng halalan... Walang personalan...Magtulungan na lang para sa katahimikan ng bayan...